შესაგებელი ადმინისტრაციულ საქმეზე

საქართველოს იუსტიციის უმაღლესი საბჭოს ადმინისტრაციული შესაგებლის ფორმის ციფრული ვერსია. ვალდებული ხართ, თქვენი შესაგებელი სარჩელსა და მასში დასმულ საკითხებზე, აგრეთვე, თქვენი მოსაზრებები სარჩელისათვის თანდართული საბუთების შესახებ სასამართლოს წარუდგინოთ სარჩელისა და თანდართული საბუთების ასლების მიღებიდან სასამართლოს მიერ განსაზღვრულ ვადაში, რომლის გაგრძელება დაუშვებელია, გარდა იმ შემთხვევებისა, როდესაც არსებობს საპატიო მიზეზი. ფორმასთან დაკავშირებით კითხვის, შენიშვნის ან რეკომენდაციის არსებობის შემთხვევაში შეგიძლიათ დაგვიკავშირდეთ ნომერზე (995 32) 227-31-00 ან მოგვწეროთ ელექტრონული ფოსტის მეშვეობით, მისამართზე: forms@hcoj.gov.ge სანიმუშო ფორმა შეგიძლიათ იხილოთ ვებ-გვერდზე: www.hcoj.gov.ge

თუ გსურთ, რომ შევსებული ფორმა თქვენს პროფილზე იქნეს შენახული, აუცილებელია ანგარიშის შექმნა. ანგარიშის შექმნის მიზნით გაიარეთ რეგისტრაცია. რეგისტრაციის გარეშე შევსებული ფორმა არ შეინახება. რეგისტრაციის გარეშე ფორმის შევსების შემთხვევაში მოახდინეთ შევსებული ფორმის ჩამოტვირთვა.

მოპასუხე:

შენიშვნა-1 მოპასუხე ხართ თქვენ (ადმინისტრაციული ორგანო, ფიზიკური ან იურიდიული პირი, ან ორგანიზაცია, რომელიც არ არის იურიდიული პირი), ვისგანაც მოსარჩელე ითხოვს დარღვეულ უფლებაში აღდგენას. შენიშვნა-5 ორი ან ორზე მეტი მოპასუხის ან მოპასუხის წარმომადგენლის არსებობისას თითოეული მათგანის პირადი და საკონტაქტო მონაცემები უნდა დაიწეროს შესაბამის გრაფაში. ალტერნატიული მისამართის, სამუშაო ადგილის და სამუშაო ადგილის მისამართის, ტელეფონის, ფაქსისა და ელექტრონული ფოსტის მითითება არაა სავალდებულო, თუმცა ხელს უწყობს თქვენს დავაზე სწრაფი და ეფექტური მართლმსაჯულების განხორციელებას. (ორი ან ორზე მეტი მოპასუხის ან მოპასუხის წარმომადგენლის არსებობისას, გამოიყენეთ გრაფის დამატების ღილაკი)

  • შენიშვნა-2 ,,ალტერნატიული მისამართის” ველში მიეთითება ის ადგილი, რომელსაც ძირითადი მისამართის (ფაქტობრივი ადგილსამყოფლის) თანადროულად იყენებთ ჩვეულებრივ საცხოვრებლად (საქმიანობის ადგილად) და რომელზეც პერმანენტულად იქნება შესაძლებელი თქვენთან დაკავშირება.

მოპასუხის წარმომადგენელი:

შენიშვნა-3 შესაძლებელია გყავდეთ კანონისმიერი (მაგ. მშობლები) ან გარიგებისმიერი წარმომადგენელი (ნებისმიერი პირი). თუ შესაგებლის შემოტანის მომენტისათვის აყვანილი გყავთ წარმომადგენელი, შესაგებელში უნდა მიუთითოთ როგორც თქვენი, ასევე, წარმომადგენლის მონაცემები. თუ შესაგებელი შეაქვს თქვენს წარმომადგენელს, მაშინ მან უნდა მიუთითოს როგორც საკუთარი, ასევე, თქვენი (მარწმუნებლის) მონაცემები. ამავე დროს, წარმომადგენელმა შესაგებელს უნდა დაურთოს წარმომადგენლობითი უფლებამოსილების დამადასტურებელი დოკუმენტი (მაგ. დაბადების მოწმობა, მინდობილობა, ამონაწერი სამეწარმეო რეესტრიდან).

საკონტაქტო პირი:

შენიშვნა-4 საკონტაქტო პირად შეგიძლიათ მიუთითოთ ნებისმიერ ფიზიკურ პირზე, რომელიც არ მონაწილეობს დავაში, მაგრამ, ნათესაური, მეგობრული თუ სხვა სახის ურთიერთობიდან გამომდინარე, შეძლებს დაეხმაროს სასამართლოს თქვენთან დაკავშირებაში. საკონტაქტო პირის მითითება არ არის სავალდებულო, თუმცა შედის თქვენსავე ინტერესში, რადგან ხელს უწყობს დავის დროულ განხილვას. (ორი ან ორზე მეტი საკონტაქტო პირის არსებობისას გამოიყენეთ გრაფის დამატების ღილაკი)

სასამართლოში დასაბარებელ პირთა სია:

შენიშვნა-6 შეგიძლიათ სასამართლოს წინაშე იშუამდგომლოთ თქვენი საქმის ზეპირი მოსმენისას მოწმეების, ექსპერტების, სპეციალისტების ან/და თარჯიმნების მოწვევის თაობაზე. შუამდგომლობებს ეთმობა ცალკე გვერდი, ამ გრაფაში კი უნდა მიუთითოთ მხოლოდ დასაბარებელ პირთა სტატუსი, მათი პირადი და საკონტაქტო მონაცემები. შენიშვნა-7 ორი ან მეტი დასაბარებელი პირის მითითებისას, თითოეული მათგანის სტატუსი, პირადი და საკონტაქტო მონაცემები უნდა დაიწეროს შესაბამის გრაფებში (ორი ან ორზე მეტი დასაბარებელი პირის არსებობისას გამოიყენეთ გრაფის დამატების ღილაკი)

შენიშვნა-8 სარჩელის სრულად ან ნაწილობრივ ცნობა ან მის ცნობაზე უარის თქმა თქვენი უფლებაა. ამასთან, ადმინისტრაციული ორგანო მხოლოდ იმ შემთხვევაშია უფლებამოსილი ცნოს სარჩელი, თუ ეს არ ეწინააღმდეგება საქართველოს კანონმდებლობას. სარჩელის სრულად ან ნაწილობრივ ცნობის შედეგია სარჩელის დაკმაყოფილება სრულად ან ნაწილობრივ. შესაბამისად, სრულად ან ნაწილობრივ გათავისუფლდებით სახელმწიფო ბაჟის გადახდისაგან. სარჩელის სრულად ცნობის შემთხვევაში შეგიძლიათ აღარ შეავსოთ ფორმა თანდართული საბუთების ნუსხამდე. სარჩელის ცნობაზე სრულად ან ნაწილობრივ უარის თქმის შემთხვევაში შესაგებლის ფორმა ექვემდებარება სრულად შევსებას.

მოპასუხის პოზიცია მოსარჩელის მიერ მითითებულ დავის ფაქტობრივ გარემოებებზე

შენიშვნა-9 მოპასუხის პოზიცია მოსარჩელის მიერ მითითებულ დავის ფაქტობრივ გარემოებებზე (I) ფაქტობრივი გარემოება არის ერთი კონკრეტული მოვლენა, რომელიც მოხდა თქვენსა და მოსარჩელეს შორის სადავო ურთიერთობისას (მაგ. უარი ადმინისტრაციული აქტის გამოცემაზე). წინამდებარე გრაფაში ვალდებული ხართ დააფიქსიროთ თქვენი პოზიცია მოსარჩელის მიერ სარჩელში მითითებულ თითოეულ ფაქტობრივ გარემოებასთან დაკავშირებით. შეგიძლიათ აირჩიოთ ხუთი პოზიციიდან ერთ-ერთი (,,ვეთანხმები”; ,,არ ვეთანხმები”; ,,ნაწილობრივ ვეთანხმები”; ,,არ ვარ ინფორმირებული”; ,,საქმისათვის არ აქვს მნიშვნელობა”). თუ ფაქტობრივ გარემოებას ნაწილობრივ ეთანხმებით, ვალდებული ხართ, დააკონკრეტოთ, თუ რა ნაწილში მიგაჩნიათ იგი უდავოდ და რა ნაწილში - სადავოდ. ვალდებული ხართ, დაასაბუთოთ თქვენი პოზიცია, თუკი სარჩელში მითითებულ ფაქტობრივ გარემოებას სრულად ან ნაწილობრივ არ ეთანხმებით, ან მიგაჩნიათ იგი საქმისათვის მნიშვნელობის არმქონედ. შენიშვნა-10 მოპასუხის პოზიცია მოსარჩელის მიერ მითითებულ დავის ფაქტობრივ გარემოებებზე (II) თქვენი პოზიცია, რომ სარჩელში მითითებულ ფაქტობრივ გარემოებას სრულად ან ნაწილობრივ არ ეთანხმებით ან მიგაჩნიათ იგი საქმისათვის მნიშვნელობის არმქონედ, შესაძლოა ემყარებოდეს სარჩელში მოცემულ მტკიცებულებებს, მათ უარყოფას, დამატებით მტკიცებულებებს ან/და დამატებით ფაქტობრივ გარემოებას. ამასთან, თითოეულ მტკიცებულებასთან დაკავშირებით მიუთითეთ იმ გვერდზე, მუხლზე, პუნქტზე, აბზაცსა თუ წინადადებაზე, სადაც თქვენთვის მნიშვნელოვანი ინფორმაციაა მოცემული. თუკი მიგაჩნიათ, რომ სარჩელში მითითებული მტკიცებულება არაა დასაშვები, ამ მტკიცებულების გრაფაში მიუთითეთ სტანდარტული ტექსტი (,,მტკიცებულება არ არის დასაშვები, წარმოვადგინე შესაბამისი შუამდგომლობა”) და წარმოადგინეთ შუამდგომლობა მტკიცებით შუამდგომლობათა ნაწილში. გაითვალისწინეთ, რომ ვალდებული ხართ, მიუთითოთ თქვენს ხელთ არსებული და თქვენთვის ცნობილი ყველა მტკიცებულების შესახებ. იმ შემთხვევაში, თუ თქვენ, საპატიო მიზეზის გამო, ვერ ახერხებთ შესაგებელთან ერთად მტკიცებულების წარმოდგენას, ვალდებული ხართ, ამ მტკიცებულების დასახელების გრაფაში მიუთითოთ სტანდარტული ტექსტი (,,წარმოვადგინე შუამდგომლობა”) და წარმოადგინოთ შესაბამისი შუამდგომლობა მტკიცებით შუამდგომლობათა ნაწილში. წინააღმდეგ შემთხვევაში ჩაითვლება, რომ აღნიშნული მტკიცებულება არ არსებობს, რაც მნიშვნელოვნად გაზრდის სასარჩელო მოთხოვნის დასაბუთებულად მიჩნევისა და, შესაბამისად, მისი დაკმაყოფილების ალბათობის ხარისხს. შენიშვნა-11 მოპასუხის პოზიცია მოსარჩელის მიერ მითითებულ დავის ფაქტობრივ გარემოებებზე (III) თქვენი პოზიცია მოსარჩელის მიერ მითითებულ დავის ფაქტობრივ გარემოებებზე უნდა ჩამოაყალიბოთ ნათლად და ლაკონურად. პოზიციები მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით. გაითვალისწინეთ, რომ სარჩელში მითითებული ფაქტობრივი გარემოებებისა და მათზე თქვენი პოზიციის ნუმერაცია უნდა ემთხვეოდეს ერთმანეთს. თითოეული პოზიციის ტექსტი უნდა შეიცავდეს უშუალოდ მის არგუმენტაციასა და ამ არგუმენტაციის დამადასტურებელ მტკიცებულებათა ნუსხას. ერთზე მეტი ფაქტობრივი გარემოების არსებობისას გამოიყენეთ გრაფის დამატების ღილაკი შენიშვნა-12 მოპასუხის პოზიცია მოსარჩელის მიერ მითითებულ დავის ფაქტობრივ გარემოებებზე (IV) პასუხში (შესაგებელში) სრულყოფილად და თანმიმდევრულად უნდა ასახოთ თქვენი მოსაზრებები სარჩელში მითითებულ თითოეულ ფაქტობრივ გარემოებასა და მტკიცებულებასთან დაკავშირებით. თუ თქვენ არ ეთანხმებით სარჩელში მოყვანილ რომელიმე გარემოებას, ვალდებული ხართ მიუთითოთ ამის მიზეზი და დაასაბუთოთ შესაბამისი არგუმენტაციით; წინააღმდეგ შემთხვევაში, გერთმევათ უფლება, შეასრულოთ ასეთი მოქმედება საქმის არსებითად განხილვის დროს.

დავის დამატებითი ფაქტობრივი გარემოებები

შენიშვნა-13 დავის დამატებითი ფაქტობრივი გარემოებები (I) გარდა პოზიციისა მოსარჩელის მიერ მითითებულ ფაქტობრივ გარემოებებზე, შეგიძლიათ თავად მიუთითოთ დავის დამატებითი ფაქტობრივი გარემოებები. გაითვალისწინეთ, რომ თქვენ მიერ მითითებული ფაქტობრივი გარემოებებით უნდა დასტურდებოდეს შესაგებლის მართებულობა და მოსარჩელის უფლებების დარღვევის ფაქტის არარსებობა. თქვენ თვითონ უნდა განსაზღვროთ, რომელი ფაქტობრივი გარემოებები დაედოს საფუძვლად თქვენს შესაგებელს სასარჩელო მოთხოვნაზე. ამავე დროს, არ მიუთითოთ იმ ფაქტობრივ გარემოებებზე, რომლებსაც საქმისათვის არ აქვთ მნიშვნელობა ან/და არ შეუძლიათ გავლენა მოახდინონ დავის გადაწყვეტაზე. ამგვარ ფაქტობრივ გარემოებებს სასამართლო არ მიიღებს მხედველობაში. პარალელურად, სასამართლო უფლებამოსილია საკუთარი ინიციატივითაც შეაგროვოს ფაქტობრივი გარემოებები. შენიშვნა-14 დავის დამატებითი ფაქტობრივი გარემოებები (II) ფაქტობრივი გარემოების ნამდვილობა დასტურდება მტკიცებულებ(ებ)ით. თითოეული ფაქტობრივი გარემოების დასადასტურებლად ვალდებული ხართ, მიუთითოთ თქვენს ხელთ არსებული და თქვენთვის ცნობილი ყველა მტკიცებულების შესახებ. ამასთან, თითოეულ მტკიცებულებასთან დაკავშირებით მიუთითეთ იმ გვერდზე, მუხლზე, პუნქტზე, აბზაცსა თუ წინადადებაზე, სადაც თქვენთვის მნიშვნელოვანი ინფორმაციაა მოცემული. იმ შემთხვევაში, თუ თქვენ, საპატიო მიზეზის გამო, ვერ ახერხებთ შესაგებელთან ერთად მტკიცებულების წარმოდგენას, ვალდებული ხართ, ამ მტკიცებულების დასახელების გრაფაში მიუთითოთ სტანდარტული ტექსტი (,,წარმოვადგინე შუამდგომლობა”) და წარმოადგინოთ შესაბამისი შუამდგომლობა მტკიცებით შუამდგომლობათა ნაწილში. წინააღმდეგ შემთხვევაში ჩაითვლება, რომ აღნიშნული მტკიცებულება არ არსებობს, რაც მნიშვნელოვნად გაზრდის სასარჩელო მოთხოვნის დასაბუთებულად მიჩნევისა და, შესაბამისად, მისი დაკმაყოფილების ალბათობის ხარისხს. პარალელურად, სასამართლო უფლებამოსილია საკუთარი ინიციატივითაც შეაგროვოს მტკიცებულებები. თუ კანონით სხვა რამ არ არის დადგენილი, ადმინისტრაციულ-სამართლებრივი აქტის არარა აქტად აღიარების, ბათილად ცნობის ან ძალადაკარგულად გამოცხადების შესახებ დავაში, მტკიცების ტვირთი ეკისრება იმ ადმინისტრაციულ ორგანოს, რომელმაც გამოსცა ეს აქტი. შენიშვნა-15 დავის დამატებითი ფაქტობრივი გარემოებები (III) ფაქტობრივი გარემოებები უნდა ჩამოაყალიბოთ ნათლად და ლაკონურად. ფაქტობრივი გარემოებები მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით. მხოლოდ განსაკუთრებით გამონაკლის შემთხვევაში, როდესაც გარემოებები ისე არიან ერთმანეთთან დაკავშირებული, რომ მათი ცალ-ცალკე მითითება შეუძლებელია, გართულდება რაიმე მოვლენის ან ფაქტის აღქმა და მოვლენის არსის წვდომა, შესაძლებელია, ერთ პუნქტში რამდენიმე გარემოების მითითება. თითოეული ფაქტობრივი გარემოების ტექსტი უნდა შეიცავდეს უშუალოდ გარემოების შინაარსს და ამ გარემოების დამადასტურებელ მტკიცებულებათა ნუსხას. ერთზე მეტი ფაქტობრივი გარემოების არსებობის შემთვევაში გამოიყენეთ გრაფის დამატების ღილაკი .

მიგაჩნიათ თუ არა, რომ საქმის წარმოება უნდა შეწყდეს?

შენიშვნა-16 შესაბამისი საფუძვლის მითითებით (მაგ. საქმის განხილვა სხვა უწყების კომპეტენციაში შედის), შეგიძლიათ მოითხოვოთ, რომ სასამართლომ შეწყვიტოს საქმის წარმოება სარჩელზე. საქმის წარმოების შეწყვეტის საფუძვლები მოცემულია სამოქალაქო საპროცესო კოდექსის 272-ე და ადმინისტრაციული საპროცესო კოდექსის მე-2 და 26(2)-ე მუხლებში.

მიგაჩნიათ თუ არა, რომ სასამართლომ სარჩელი განუხილველად უნდა დატოვოს?

შენიშვნა-17 შესაბამისი საფუძვლის მითითებით (მაგ. სარჩელი (განცხადება) დაინტერესებული პირის სახელით შეიტანა იმ პირმა, რომელსაც არა აქვს საქმის წარმოების უფლებამოსილება), შეგიძლიათ მოითხოვოთ, რომ სასამართლომ სარჩელი განუხილველად დატოვოს. სარჩელის განუხილველად დატოვების საფუძვლები მოცემულია სამოქალაქო საპროცესო კოდექსის 275-ე მუხლში.

მიგაჩნიათ თუ არა, რომ სასამართლომ უნდა შეაჩეროს საქმის წარმოება?

შენიშვნა-18 შესაბამისი საფუძვლის მითითებით (მაგ. მხარე იმყოფება ხანგრძლივ სამსახურეობრივ მივლინებაში), შეგიძლიათ მოითხოვოთ, რომ სასამართლომ საქმის წარმოება შეაჩეროს. საქმის წარმოების შეჩერების საფუძვლები მოცემულია სამოქალაქო საპროცესო კოდექსის 279-ე და 280-ე მუხლებში. საქმის წარმოება განახლდება იმ გარემოებათა აცილების შემდეგ, რომლებმაც გამოიწვია წარმოების შეჩერება. წარმოების განახლების შემდეგ საქმის განხილვა გრძელდება საერთო წესით.

ხომ არ აპირებთ, შეგებებული სარჩელის აღძვრას?

შენიშვნა-19 შეგებებული სარჩელი შესაგებელთან ერთად სარჩელისაგან თავდაცვის ერთ-ერთი საშუალებაა, თუმცა შეგებებული სარჩელის წარდგენით თქვენ არა მხოლოდ პასიურად იცავთ თავს სარჩელისაგან, არამედ იმავდროულად თქვენს დამოუკიდებელ მოთხოვნებს აყალიბებთ მოსარჩელის წინააღმდეგ. შეგებებული სარჩელის აღძვრა დასაშვებია საქმის ზეპირი განხილვისათვის მომზადების დამთავრებამდე. საქმის ზეპირი განხილვისათვის მომზადების დასრულებიდან სასამართლო პაექრობის დაწყებამდე შეგებებული სარჩელის წარდგენა დასაშვებია მხოლოდ საპატიო მიზეზის არსებობისას. გაითვალისწინეთ, რომ შეგებებული სარჩელის წარდგენა არ დაიშვება, თუ სასარჩელო მოთხოვნა შეეხება ადმინისტრაციულ-სამართლებრივი აქტის ბათილად ცნობას ან ადმინისტრაციულ-სამართლებრივი აქტის გამოცემას.

მოპასუხის პოზიცია სასარჩელო მოთხოვნასა და მის სამართლებრივ საფუძვლებზე

შენიშვნა-20 მოპასუხის პოზიცია სასარჩელო მოთხოვნასა და მის სამართლებრივ საფუძვლებზე (I) მოსარჩელემ სარჩელი შეიძლება აღძრას: (1)ადმინისტრაციულ-სამართლებრივი აქტის ბათილად ცნობის ან ძალადაკარგულად გამოცხადების მოთხოვნით; (2)ადმინისტრაციულ-სამართლებრივი აქტის გამოცემის მოთხოვნით; (3)ისეთი მოქმედების განხორციელების ან ისეთი მოქმედებისაგან თავის შეკავების მოთხოვნით, რომელიც არ გულისხმობს ინდივიდუალური ადმინისტრაციულ-სამართლებრივი აქტის გამოცემას. ვალდებული ხართ, წინამდებარე გრაფაში დააფიქსიროთ თქვენი პოზიცია მოსარჩელის მიერ სარჩელში მითითებულ თითოეულ მოთხოვნასთან მიმართებით. შეგიძლიათ აირჩიოთ სამი პოზიციიდან ერთ-ერთი (,,ვეთანხმები”; ,,ნაწილობრივ ვეთანხმები”; ,,არ ვეთანხმები”). თუ სასარჩელო მოთხოვნას ნაწილობრივ ეთანხმებით, ვალდებული ხართ, დააკონკრეტოთ, თუ რა ნაწილში მიგაჩნიათ იგი მართებულად და რა ნაწილში - უმართებულოდ. შენიშვნა-21 მოპასუხის პოზიცია სასარჩელო მოთხოვნასა და მის სამართლებრივ საფუძვლებზე (II) სამართლებრივი საფუძვლები არის იმ ნორმათა ერთობლიობა, რომლებზეც ამყარებთ თქვენს შესაგებელს სასარჩელო მოთხოვნის სამართლებრივ საფუძვლებზე. ნორმათა შინაარსი გამომდინარეობს სამართლებრივი აქტებიდან, ჩვეულებებიდან და სხვ. ნორმათა შინაარსი შეგიძლიათ განმარტოთ თავისუფლად, თქვენს მოსაზრებებზე, სასამართლო გადაწყვეტილებებსა და პრაქტიკაზე, საერთაშორისო სტანდარტებზე, უცხოურ კანონმდებლობასა და სხვა სახის არგუმენტებზე მითითებით, აგრეთვე შეიძლება მიეთითოს ადამიანის უფლებათა და ძირითად თავისუფლებათა დაცვის კონვენციისა და მისი დამატებითი ოქმების ნორმები და მსგავს სამართლებრივ საკითხზე ადამიანის უფლებათა ევროპული სასამართლოს პრეცედენტები. სამართლებრივი საფუძვლები იურიდიულად უნდა აბათილებდეს სასარჩელო მოთხოვნას. სამართლებრივი საფუძვლების მითითება სავალდებულო არ არის, თუმცა გეძლევათ შესაძლებლობა, სასამართლოს თქვენი სამართლებრივი არგუმენტაცია მიაწოდოთ, რათა დაარწმუნოთ იგი თქვენი შესაგებლის მართებულობაში. შენიშვნა-22 მოპასუხის პოზიცია სასარჩელო მოთხოვნასა და მის სამართლებრივ საფუძვლებზე (III) თითოეული შესაგებელი სასარჩელო მოთხოვნაზე და მისი სამართლებრივი საფუძვლები უნდა ჩამოაყალიბოთ ნათლად და ლაკონურად. თქვენი პოზიცია თითოეულ სასარჩელო მოთხოვნასთან დაკავშირებით მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით. თითოეული პოზიციის ტექსტი შეიცავს უშუალოდ პოზიციასა და მითითებას ამ პოზიციის სამართლებრივ საფუძვლებზე. ერთზე მეტი პოზიციის დასაფიქსირებელად გამოიყენეთ გრაფი დამატების ღილაკი.

მტკიცებითი შუამდგომლობები

შენიშვნა-23 შუამდგომლობა არის თქვენი მიმართვა სასამართლოსადმი კონკრეტული პროცესუალური მოქმედების განხორციელების მოთხოვნით. შუამდგომლობა უნდა იყოს დასაბუთებული, მასში კონკრეტულად უნდა მიეთითოს მოთხოვნა და მისი არგუმენტაცია, რომელიც უნდა შეეხებოდეს შუამდგომლობაში დასმულ საკითხთან უშუალო კავშირში მყოფ გარემოებებს. მტკიცებითი შუამდგომლობები შეეხება მტკიცებულებებს. შენიშვნა-24 ქვემოთ მოცემულია საქმის ზეპირ მოსმენაზე მოწმეთა, ექსპერტთა და სპეციალისტთა მოწვევის გრაფები. სადაც მიეთითება მოსაწვევი მოწმის, ექსპერტის ან/და სპეციალისტის სახელი და გვარი და დავის იმ ფაქტობრივ გარემოებათა ნომრები, რომლებსაც მიგაჩნიათ, რომ დაადასტურებენ აღნიშნული პირები. (ორი ან ორზე მეტი, მოწმის, ექსპერტის, სპეციალისტის ან/და შუამდგომლობის არსებობისას, გამოიყენეთ გრაფის დამატების ღილაკი)

  • შენიშვნა-25 მტკიცებულებები დაუშვებელია, თუ: (1)საქმის გარემოებები, რომლებიც კანონის თანახმად უნდა დადასტურდეს გარკვეული სახის მტკიცებულებებით, არ შეიძლება დადასტურდეს სხვა სახის მტკიცებულებებით; (2)ისინი მოპოვებულია კანონის დარღვევით; (3)მათ საქმისათვის არ აქვთ მნიშვნელობა. დაუშვებელ მტკიცებულებებს სასამართლო საქმიდან ამოიღებს.

    შენიშვნა-26 თუკი საპატიო მიზეზის გამო, შესაგებელს ვერ ურთავთ მტკიცებულებას, შეგიძლიათ, იშუამდგომლოთ სასამართლოს წინაშე, რათა მან მოგცეთ გონივრული ვადა მის წარმოსადგენად. ვალდებული ხართ, შუამდგომლობაში მიუთითოთ: (1)მტკიცებულების დასახელება; (2)წარმოდგენის შეუძლებლობის საპატიო მიზეზი; (3)გონივრული ვადა მის წარმოსადგენად. თითოეულ ამგვარ მტკიცებულებასთან მიმართებით შუამდგომლობები მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით.

    შენიშვნა-27 თუკი საკუთარი ძალებით ვერ შეძელით მტკიცებულების მიღება იმ პირისაგან, ვისთანაც ეს მტკიცებულება იმყოფება, შეგიძლიათ იშუამდგომლოთ სასამართლოს წინაშე, რათა სასამართლომ გამოითხოვოს იგი. ვალდებული ხართ, შუამდგომლობაში მიუთითოთ: (1)მტკიცებულების დასახელება; (2)იმ პოზიციათა ან დავის დამატებით ფაქტობრივ გარემოებათა ნომრები, რომლებიც დგინდება ამ მტკიცებულებით; (3)მტკიცებულების მფლობელის სახელი და გვარი (სახელწოდება) და მისი საცხოვრებელი ადგილი (ფაქტობრივი ადგილსამყოფელი); (4)რა საფუძვლით გეთქვათ უარი მტკიცებულების გადმოცემაზე; (5)რას ეფუძნება თქვენი ვარაუდი, რომ მტკიცებულება თქვენ მიერ მითითებული პირის ხელთაა. თითოეულ ამგვარ მტკიცებულებასთან მიმართებით შუამდგომლობები მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით.

სხვა სახის შუამდგომლობები

შენიშვნა-28 ამ გრაფაში შეგიძლიათ ჩაწეროთ ნებისმიერი სხვა სახის შუამდგომლობა (მაგ. საქმეში მესამე პირის ჩაბმის თაობაზე). თითოეული შუამდგომლობა უნდა მიუთითოთ ნათლად და ლაკონურად. მოთხოვნები მიეთითება სათითაოდ (პუნქტობრივად) და ინომრება თანმიმდევრულად, არაბული ციფრებით. თითოეული მოთხოვნის ტექსტი უნდა შეიცავდეს უშუალოდ მოთხოვნის შინაარსს და მის არგუმენტაციას. ორი ან ორზე მეტი შუამდგომლობის არსებობისას, გამოიყენეთ გრაფის დამატების ღილაკი

გაქვთ თუ არა აცილება მოსამართლის მიმართ?

შენიშვნა-29 შესაბამისი საფუძვლის მითითებით (მაგ. მოსამართლე თავადაა დავის მხარე), შეგიძლიათ განაცხადოთ აცილება საქმის განმხილველი მოსამართლის მიმართ. მოსამართლის აცილების საფუძვლები მოცემულია სამოქალაქო საპროცესო კოდექსის 29-ე, 30-ე, 31-ე მუხლებსა და ადმინისტრაციული საპროცესო კოდექსის მე-7 მუხლში.

დაგჭირდებათ თუ არა თქვენ ან/და დასაბარებელ პირს თარჯიმანი საქმის ზეპირი განხილვისას?

თქვენს ინტერესში შედის საქმის მორიგებით დამთავრება. მორიგება წარმოადგენს დავის გადაწყვეტის ყველაზე სწრაფ, ეფექტურ და იაფ საშუალებას. ამასთან, გეძლევათ შესაძლებლობა, თავად განსაზღვროთ დავის შედეგი, ასევე, აღმოფხვრათ კონფლიქტი ერთმანეთს შორის. სასამართლო სხდომამდე მხარეთა მორიგების შემთხვევაში მხარეები მთლიანად თავისუფლდებიან სახელმწიფო ბაჟის გადახდისაგან, ხოლო სასამართლო სხდომაზე მორიგების შემთხვევაში სახელმწიფო ბაჟის ოდენობა ნახევრდება. მოურიგებლობის ნეგატიური შედეგებია: » რთულადგანჭვრეტადი შედეგი; » ხანგრძლივი სასამართლო პროცესი; » სასამართლო ხარჯები; » სასამართლოსგარეშე ხარჯები; » ყოველდღიური ხარჯები.

თანახმა ხართ თუ არა, რომ საქმე დაამთავროთ მორიგებით?

შენიშვნა-30 დააფიქსირეთ თქვენი პოზიცია საქმის მორიგებით დამთავრებასთან დაკავშირებით. თანხმობის შემთხვევაში მიუთითეთ თუ რა პირობებით ხართ თანახმა მორიგებაზე. უარის შემთხვევაში ვალდებული ხართ, დაასაბუთოთ თქვენი უარი (მიუთითოთ უარის მოტივებზე). ადმინისტრაციული ორგანო მხოლოდ იმ შემთხვევაშია უფლებამოსილი საქმე მორიგებით დაამთავროს, თუ ეს არ ეწინააღმდეგება საქართველოს კანონმდებლობას.

თანდართული საბუთების ნუსხა

შენიშვნა-31 თანდართული საბუთები (I) ვალდებული ხართ, შესაგებელს დაურთოთ მასში მითითებული ყველა მტკიცებულება, გარდა იმ შემთხვევისა, როდესაც, საპატიო მიზეზის გამო, ვერ ახერხებთ მათ წარმოდგენას და აღნიშნულის თაობაზე მიუთითეთ მტკიცებით შუამდგომლობათა ნაწილში. წერილობითი მტკიცებულებები, როგორც წესი, წარდგენილ უნდა იქნეს დედნის სახით. თუ წერილობითი მტკიცებულების დედანი უცხო ენაზეა შედგენილი, იგი უნდა ითარგმნოს ქართულად (აფხაზეთში შესაძლებელია აფხაზური თარგმანიც). ნორმატიული მასალის დართვა სარჩელზე მხოლოდ განსაკუთრებით გამონაკლის შემთხვევებშია გამართლებული. თანდართული საბუთები იწერება სათითაოდ (პუნქტობრივად) და ინომრება თანმიმდევრულად, არაბული ციფრებით. ხოლო ნუსხის დასრულების შემდეგ - ფურცლების საერთო რაოდენობა. (ერთზე მეტი დანართის არსებობის არსებობისას, გამოიყენეთ გრაფის დამატების ღილაკი) შენიშვნა-32 თანდართული საბუთები (II) სასამართლოს უნდა წარუდგინოთ შესაგებლისა და თანდართული საბუთების იმდენი ასლი, რამდენი მოსარჩელეც არის საქმეში.

თანახმა ხართ თუ არა, რომ სასამართლომ საქმე განიხილოს ზეპირი მოსმენის გარეშე?

შენიშვნა-33 წარმოადგინეთ თქვენი მოსაზრება საქმის ზეპირი მოსმენის გარეშე განხილვის თაობაზე. საქმის ზეპირი მოსმენის გარეშე განხილვა მნიშვნელოვნად უწყობს ხელს დავის სწრაფად გადაწყვეტას, ზოგავს თქვენს დროს და სახსრებს. თქვენი და მოსარჩელის თანხმობის შემთხვევაში სასამართლო უფლებამოსილია, მაგრამ არაა ვალდებული, საქმე განიხილოს ზეპირი მოსმენის გარეშე.

შენიშვნა-34 მოცემული გრაფის შევსება სავალდებულოა იმ შემთხვევაშიც, თუ თქვენ თანახმა ხართ, სასამართლომ საქმე განიხილოს ზეპირი მოსმენის გარეშე. პოზიციის დასაბუთებაში იგულისხმება მთავარი სხდომის უშუალოდ თქვენთვის განკუთვნილი ნაწილი. თუ ირჩევთ 25-ზე მეტ წუთს ან 2-ზე მეტ სხდომას, ვალდებული ხართ, მიუთითოთ, თუ რაში მდგომარეობს თქვენი საქმის სპეციფიკური სირთულე. ამასთან, გაითვალისწინეთ, რომ სასამართლოსათვის სავალდებულო არაა თქვენ მიერ მითითებული დრო და სხდომათა რაოდენობა.

თანახმა ხართ თუ არა, რომ სასამართლომ საქმე განიხილოს დაჩქარებული წესით?

შენიშვნა-35 დაჩქარებული წესით საქმის განხილვის დროს სასამართლო უფლებამოსილია: (1)შეამოკლოს თქვენ მიერ შესაგებლის ან შეგებებული სარჩელის წარდგენის ვადა; (2)მესამე პირს არ განუსაზღვროს ვადა სარჩელზე საკუთარი მოსაზრებების წარდგენისათვის; (3)არ დაადგინოს მხარეების მიერ ექსპერტის დანიშვნასთან დაკავშირებით საკუთარი მოსაზრებების წარდგენის ვადა; (4)შეუმოკლოს მხარეებს ექსპერტის დასკვნასთან დაკავშირებით საკუთარი მოსაზრებების წარდგენის ვადა.

თანახმა ხართ თუ არა, რომ წერილობითი მასალები მიიღოთ ელექტრონული ფოსტის მეშვეობით?

შენიშვნა-36 შეგიძლიათ განაცხადოთ თანხმობა, რომ წერილობითი მასალები გადმოგეგზავნოთ ელექტრონული ფოსტის მეშვეობით, რაც უზრუნველყოფს მათ უფრო დროულ მოწოდებასა და კომფორტულ ხელმისაწვდომობას. ამავე დროს, სასამართლოს სპეციალური პროგრამა დროის რეალურ რეჟიმში მოგაწვდით ინფორმაციას თქვენს საქმეზე განხორციელებული ყველა არსებითი ცვლილების თაობაზე.

გთხოვთ, გაითვალისწინოთ! სასამართლოში საქმის განხილვა მიმდინარეობს თანასწორობისა და შეჯიბრებითობის პრინციპის საფუძველზე _ თქვენ გეკისრებათ როგორც ფაქტების მითითების, ასევე მათი დამტკიცების ტვირთი. საქმის საბოლოო შედეგი დამოკიდებულია იმაზე, თუ როგორ დაასაბუთებთ თქვენს პოზიციას და რომელი მტკიცებულებით დაადასტურებთ მათ ანუ წარმატებას განაპირობებს თქვენი პროფესიონალიზმი და თქვენს მიერ წარმოდგენილი მტკიცებულებები. ჩემი (ჩემი მარწმუნებლის) ცოდნის, ინფორმირებულობისა და რწმენის საუკეთესო გამოვლინებით, ამ ფორმაში ფაქტები მივუთითე სრული სახით და ისინი შეესაბამება სინამდვილეს. ვაცნობიერებ, თუ რა შედეგთან არის დაკავშირებული მონაცემების არასწორი ან/და არასრული მითითება.

შევსებული ფორმა შეგიძლიათ ჩააბაროთ სასამართლოს კანცელარიის (მისაღების) მოხელეს ან გამოაგზავნოთ ფოსტის მეშვეობით. სასამართლოს კანცელარია (მისაღები) მუშაობს 09:30-დან 18:00 საათამდე, ორშაბათიდან პარასკევის ჩათვლით.

კლავიატურის მალსახმობები

ამ ფანჯრის დასახურად ან ხმოვანი დახმარების გასაჩერებლად დააჭირეთ Esc-ს.

?
ამ დახმარების ფანჯრის გახსნა ან დახურვა.
g შემდეგ h
მთავარ გვერდზე გადასვლა.
g შემდეგ f
ფორმების სიაზე გადასვლა.
g შემდეგ p
პროფილზე გადასვლა (თუ არ ხართ შესული — შესვლის გვერდი).
g შემდეგ l
შესვლის გვერდი.
g შემდეგ r
რეგისტრაციის გვერდი.
r
გვერდის შესავლის გამეორება.
Shift + R
მთელი გვერდის წაკითხვა.
n / p
მომდევნო ან წინა ინტერაქტიულ ელემენტზე გადასვლა.
m
მთავარ შინაარსზე გადასვლა.
s
მიმდინარე ფორმის გაგზავნა.
+ / -
ტექსტის გადიდება ან შემცირება.
c
მაღალი კონტრასტის ჩართვა/გამორთვა.
v
ხმოვანი დახმარების ჩართვა/გამორთვა.